球員着波衫就睇得多，着晒西裝嘅官仔骨骨樣，多數喺佢哋落機或上旅遊巴先見得到。歐國盃今日開鑼，各路大軍陸續抵達瑞士同奧地利，我求大俠當然生滋貓入眼昅到實，睇吓邊隊着老西最有型。睇完幾隊都係冇乜特別，不過「狂牛」西班牙就好唔掂囉！
西班牙今屆人腳好，連國米新教頭「型佬」摩連奴都睇好可以捧盃，不過我求大俠唔係對西班牙有偏見，只係有嗰句講嗰句，通常着得老西都要高高地先好睇，可能咁啱西班牙特別多矮仔，着起上嚟好似「啷」唔起套西裝咁。
仲有呀，佢哋套黑色老西顏色特別沉，冇乜亮澤，望落去質料有啲似天鵝絨，着到成班冇嚟神氣，十足木無表情嘅G4保鑣咁。喂！精神啲先得㗎！不過最肉酸嘅都係教練阿拉干尼斯，69歲嘅佢黑衫黑褲襯住成把白頭髮，同神父冇乜分別，只係頸上爭條十字架鏈仔咁解啫。

德國着Strenesse好睇

雖然其他隊伍都唔算太過標青，但起碼喺套西裝上都叫搞啲花臣嘢。好似法國全灰色套裝咁，喺條衫領邊加條藍色「綑」住，叫做有啲特色；不過點講都似校褸加校服，因為佢哋將個法國足總logo繡埋落件西裝胸口出面，唔似校褸似咩喎？
講到型，除咗意大利套D&G，同埋德國嘅Strenesse着得比較好睇外，瑞典套灰色西裝襯灰黑色格仔呔都算唔錯。可能伊巴謙莫域都驚自己似着緊校服，於是佢索性除咗件「校褸」，實行恤衫出面再笠件FredPerry冷衫，嘩，型晒！