龍年伊始，萬象更新。李八方今年嘅首宗猛料，肯定令讀者有「意外驚喜」，事關八方粉絲最愛嘅議員鼠王芬，今年會有「新伴」。嗱，各位唔好心邪，八方講嘅「伴」，只係工作上嘅夥伴。事關中聯辦九龍工作部決定喺九龍東力捧謝偉俊，呢對西環法律孖寶，注定係今年最當旺嘅「金童玉女」，又或者，應該係瘋男瘋女。

近期喺九龍東出沒嘅讀者，隨處可見Paul謝嘅橫額，農曆年間佢喺鑽石山中產區寫揮春，年底立法會選舉由旅遊界轉去九東直選已經係鐵一般事實。有人覺得Paul謝藝高人膽大，八方就覺得，如果後台夠雄厚，選乜都咁easy，因為中聯辦九龍工作部已經篤定將Paul謝打造成「九東鼠王芬」。
知情人士同八方爆料，Paul謝獲「欽點」，因為佢同鼠王芬一樣都係法律界中人，形象較中產，而九龍東向來只由民建聯同工聯會兩大基層政黨搶到位，係時候開拓吓中產票。據聞中聯辦已經落晒柯打叫觀塘民聯會幫拖，仲講到明唔好淨係喺基層做嘢，要喺中產區開工至得。總之Paul謝萬千寵愛在一身，同鼠王芬篤定做金童玉女，白姐姐咪呷醋呀。