韓國女團少女時代隊長泰妍上月飛抵印尼出席活動，但當佢現身耶加達機場時因現場接機粉絲太混亂，導致佢被胸襲、摸pat，甚至被推落地，嚇到泰妍當場崩潰爆喊(新聞連結: http://bit.ly/2icryVm )，及後泰妍所屬SM事務所被粉絲及網民指責冇盡好保護藝人嘅責任。

而泰妍嘅同門師妹Red Velvet隊長Irene，前日同樣要飛到印尼工作，為音樂節目《音樂銀行in雅加達》任主持人，SM事務所似乎汲取泰妍事件嘅教訓，Irene前日現身機場時，保安明顯有加強。

Irene前日飛甩隊友現身首爾仁川國際機場，準備出國飛到印尼錄製音樂節目，身穿碎花連身裙嘅佢心情似乎好好，同工作人員有講有笑。而當Irene行入機場時，即時被8名身形壯碩嘅保安包圍住，同時仲有3名工作人員跟喺Irene身邊，粉絲完成無法埋藝人身，保安工作做到滴水不漏，反而令到Irene怕醜傻笑。