王若琪（Takki）今日到商台宣傳新歌《重圓》，提到今日因反《逃犯條例》，不少市民上街包圍立法會，Takki呼籲大家不要過份衝擊：「有啲人好好，但亦有啲人係為搞事而搞事，佔中嗰啲都係咁，希望唔好有流血事件。我對所有政冶嘢都係抱中肯態度，我未夠料去講，而且兩邊都有好同唔好，我未叻到去判斷一個國家點管治十幾億人民。」

說回新歌，Takki表示為亡父而寫：「不過我希望大家可以對號入座，唔一定要送畀已經離開嘅親人，可以係一個遺憾。」她透露爸爸離世時，曾經有段時間患上輕微躁鬱症：「個醫生好好，佢話我冇呢啲情緒做唔到呢行，係1、2年前嘅事，而家都有食緊藥，不過個人好咗好多，醫生講笑叫我當supplement咁食。」Takki自嘲不是正能量寶寶，但想創作有鼓勵性的音樂：「我都係偏向淒美，但要有解決辦法、釋懷嘅感覺。」

Takki坦言現時自資出歌，因此很大投資，笑言是「玩大咗」，原本計劃今年造7首歌，現時應只可推出5首，她說：「《重圓》嘅MV好重要，我搵咗唐寧做女主角。因為我爸爸係粵劇音樂領班，所以我哋又要去學粵劇造手，個MV由朝早7點拍到夜晚12點，真係超晒資。」她笑指幸好唐寧只是收利是作酬勞：「我教佢結他做交換，同埋佢唱歌幾好聽，遲啲我哋都會有啲合作。」

-----------------------------
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9