日系裝修第二彈 穿窿屋皆因要引風？ 《瀛屋‧型屋》教你執正間屋！丨果燃上架
蘋果日報 2020/12/14 00:00
果燃台編輯推介瀛屋‧型屋
上回《瀛屋‧型屋》講到「裝修之奧義」，一口氣帶大家睇咗5個日系裝修盤，尤其位於東京昭島市河井夫婦嘅case，佢兩公婆透過黏黏貼貼、拼湊、挾、懸吊等等嘅方式，將業主間屋改頭換面，相信畀到唔少靈感香港人！鬼咩，香港啲屋豆腐膶咁細，唔花啲心思執執佢，真係連擺雜物都唔夠位㗎！今期《果燃台》嘅《瀛屋‧型屋》繼續秉承「執正間屋」嘅信念，搵嚟千奇百趣嘅特色裝修風，事不宜遲喇，去睇片之前刨刨文先啦！
今期《瀛屋‧型屋》第二彈為你帶嚟4個case。好似打頭陣嘅「東京杉並區之怪風屋」，就肯定令你嘆為觀止喇！咪先，怪風？呢次個「風」字並唔係指「風格」咁解，而係講緊呢間屋真係有一陣怪風吹入嚟㗎！話說屋主近藤先生幾年前買咗間建築面積只有285平方呎嘅二手樓，話就話日本無分建築面積同實用面積啫，但285平方呎又確實係細咗啲嘅，邊夠近藤先生一家四口住呢？而且原屋嘅設計冬天凍，夏天又熱，實在係錯漏百出，於是做建築師嘅近藤先生就心生一計，不如成間屋大裝啦！唔知係咪受到當年唐英年地下唐宮嘅啟發，近藤san於是就諗到將間屋向下發展成為地庫屋！當然佢係合法加建嘅。
原本只有兩層嘅小屋，點樣變出成千呎？
玩地庫唔係無得諗，只係衰在如果住喺地庫的話，通風系統好差，呢個問題點都要tackle咗佢先有得做！於是近藤san就鑽研通風方法，最後決定喺家中留空一個大「咕窿」，將光源同生風引入兩層地庫，而地面嘅設計亦都無四面「封關」咁包到實，夜晚嘅時候一家四口仲可以曬月光添呀！呢種既環保又慳位嘅實用裝修，就將一個明明只得285平方呎嘅地方，一變就變成過千呎，而且每層都唔受地庫影響，層層有特色！建築師果然係建築師，確係有諗頭呀！
答案係向地下發展，加建多兩層嘅地牢。而家1樓全層係廚房兼飯廳，非常闊落。
地下面嗰兩層係睡房同活動空間，夠晒寬敞。
第二單case嚟到京都北區。去過京都「返鄉下」嘅香港人就一定清楚喇，京都最出名係「竹林深處人家」嗰種大自然氣息，再配搭上古色古香嘅日本古代和式設計（尤其體現喺大量嘅寺廟上面）。咁講又真係無錯㗎，因為京都係古代王都，喺京都起傳統房屋「京町家」係有好講究嘅嚴格限制，而現今嘅京都亦成為咗遊客區，因此連起幢樓都會有景觀設計規限，係所有屋主都必須遵守嘅。譬如屋頂指明要用日本灰色嘅瓦片，屋簷嘅坡度亦限制喺16.7至24.2度之間等等，真係犯法就係犯法，住喺京都都要守法呀！
京都係古代王都，喺京都起傳統房屋「京町家」一磚一瓦甚至連幢樓嘅外觀，都有好講究嘅嚴格限制。
要守咁嚴謹嘅規矩，但又堅持要起靚佢嘅偏偏唔係後生仔，而係一個退休伯伯！呢間「豊田伯伯恩愛夫妻退休屋」唔單止有外表，裏面仲犀利㗎，話說豊田伯伯後生嗰時都係一個建築師（點解呢行好似咁容易做嘅？），兩公婆捱到仔女大晒出晒身，就決定返到太太嘅鄉下關西養老。由於豊田婆婆由細到大都好想自己張床好似列車臥鋪咁，「愛妻號」嘅豊田伯伯就特登為太太整咗一張仿製火車廂嘅卧鋪（喂伯伯，你咁做真係害死啲後生仔㗎）。而細心嘅豊田伯伯亦了解到，日本有較多老年人因「熱休克」而死亡嘅案件，於是喺設計上，豊田伯伯仲導入咗唔少暖氣出風位，減低屋內溫差。諗得咁周到嘅男人，點解偏偏都係結咗婚，而且又永遠唔係你個男朋友㗎？點解呀？
豊田先生係建築師，佢為自己設計嘅書房好有書卷味，睇圖都好似聞到。
豊田真係窩心，喺屋內導入咗唔少暖氣出風位減低屋內溫差，對太太同貓貓無微不至。
第三單case我哋轉吓地方，去好多香港人都識嘅「長期糧尾」個故鄉「長崎」，睇吓呢間「長崎佐世保時光隧道之屋」。喺第一個case裏面，我哋見到近藤先生巧妙嘅設計，用垂直嘅「咕窿」引入生風同光源，聰明又巧妙；但係呢間「長崎佐世保時光隧道之屋」就唔同喇，佢唔需要引入生風，但就無厘頭喺間屋正中心鑿穿一個好似時光隧道咁嘅大「咕窿」，到底為咗啲乜呢？
三浦小姐呢間祖屋，起喺山坡上面，有54年樓齡。
原來呢間屋已經起咗成54年，由阿爺阿嫲嗰代傳到畀三浦小姐。由於呢間屋起喺山上面，又犯上夏天炎熱冬天凍，仲有埋昆蟲、出出入入上上落落唔方便等嘅毛病，於是三浦家就諗住賣咗佢，索性「移民」去日本第二度好過。點知呢間屋位處山上，中正「土砂災害警戒區域」範圍，車又入唔到嚟，賣又賣唔出，罕有地呢份遺產無後代繼承，最後就由三浦小姐要咗佢喇！
一條13米長嘅「隧道」，出現嘅理由有啲奇怪，但怪有怪着，最後變咗間屋嘅特色。
三浦小姐本身開食堂，自己做老闆兼主廚，忙到不堪，一收工就返屋企瞓覺，幾年間都無點樣執屋打掃。突然有一日三浦小姐覺得咁落去都唔係辦法，不如幫間屋執正佢，順便執正自己嘅人生啦。哈哈，點知裝修到一半嘅時候三浦小姐又發現「畢直」唔夠喎，咁點搞呢？咁就惟有集中裝修好自己每日逗留得最長時間嘅地方——廚房同客飯廳喇，於是，呢個古怪嘅「時光隧道」，就喺咁樣嘅形式之下誕生咗喇！三浦小姐好鍾意對住個隧道口睇風景，呢度嘅view肯定比起誠哥口中嘅心曠神怡更加心曠神怡先啦。不過話時話，又無門閂，又無圍欄，怕唔怕跌落去又或者有賊打劫呢？
坐喺「隧道」口睇風景，令三浦小姐有重生嘅感覺。
呢期最後一個case，都係一個奇人，或者直情話係奇怪家族添呀！有都市屋佢唔住，偏偏要喺森林買地起樓——仲要唔係搵人起，而係自己親手起，用森林嘅木頭為自己起咗7間森林屋，最後就造就咗牧氏家族呢間「關西兵庫縣聰明笨伯之原始屋」喇！
在森林和原野，有一列7間原木屋，應該住得幾逍遙。
年老嘅牧先生話，當初因為佢哋想過住悠然自得嘅田園生活（睇得出吖），所以決定自己購入森林地皮，全家落手落腳起咗7間原木屋。因為一家大細都有落手做，所以呢個係一個好好嘅親子活動喎！用起樓嚟做親子活動，睇怕全地球都無乜邊幾個有牧氏家族咁勁揪喇！
牧先生一家大細，落手落腳起咗呢7間原木屋。
樑柱傢俬，全部都係實原木製，好有原始感覺。
一按即睇 果燃台丨瀛屋‧型屋－ 建築在森林和原野的7幢原木屋
今期《果燃台》嘅《瀛屋‧型屋》，4個個案都可謂各有千秋，穿窿嘅有，起上山嘅又有，喺森林嘅又有，連傳統嘅京町家都有！有冇邊款裝修啱心水？睇啱嘅不妨將當中嘅精髓放入自己間屋度，話唔定都係一個好fusion嘅mix & match嚟㗎！
果燃台 | 果迷專屬嘅影片世界
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！