新世界發展（017）前日有一手3.6億元大成交上板，噚日再有一宗逾6億元的大手成交上板，股價大升7.3%至11元。唔通市場真係咁受落分拆百貨業上市呢個消息？不過，快將分拆泓富上市的長實（001）只升0.99%，而分拆廣州地產物業上市的越秀投資（123）則無起跌。
被日立控侵權的唯冠（334）連日來股價急升，由0.465元炒高至噚日0.72元收市，累積升幅達55%。公司主席上周五話過會朝和解方向解決問題，並會在短期內公布。其實呢類官司要和解不難，因為控方主要是維護本身利益及索償，問題是唯冠要賠幾多日立才滿意？而和解協議對唯冠的殺傷力，則要待公布後研究過至知，現時股價由低位大反彈，提防有人趁好消息後出貨獲利。
捷美能源（702）表明與中石化（386）在內地的訴訟快將達成和解，股價應聲炒高19.14%至0.056元，成交278萬元。唔知新股東幾時搞掂埋捷美嘅財務問題呢？

新澤冇穩定股價措施

近期新股表現不俗，首日掛牌動輒有兩三成升幅，噚日車身飾件供應商敏實（425）首日掛牌，較招股價高42%，收報3.20元。至於今日掛牌嘅新澤（095）會否有咁強勁表現，阿虎就有所保留。新澤主要在蘇州發展中高檔房地產，發行1.68億股新股，其中1680萬股公開發售，但只獲0.68倍超購，以0.58元接近下限定價，保薦人亦唔會有穩定股價措施，基於以上因素，今日破底可期。不過黑客話，隻股貨源歸邊，出現勁炒都唔定。
阿虎