青姐（胡孟青）劈炮唔做有線後，聽講節目收視滑落，唔知係唔係新嚟條友無聲無氣，冇人壓住個場，仲居然俾個觀眾打上嚟節目踢館，狂鬧主持人兼數部份財演（財經演員）。讀者未睇段片真係要睇吓，包你拍案叫絕。網址： http://www.youtube.com/watch?v=GXRZSxrFc2U
段片精采之處，係個觀眾起初堅有禮貌，唔該前唔該後，點知一入正題問人意見，就吓吓頂心頂肺，插到應晒，仲要開名抨擊個別股佬誤導投資者，話亂咁評論唔怕有報應咩。兩個主持即時「O」嘴，被殺個措手不及，有線主持要立即cut電話迴避。
坦白講，華華覺得嗰位觀眾無證無據，指控人哋先唱好、後沽空，做法的確唔妥。但相信呢位康小姐，應該中咗好多次招，仲係大大鑊嗰隻，先會累積到咁大怨氣，打上台控訴。