近年傳統航空公司面臨多重挑戰，既要開源又要節流，令到服務質數每下愈況，有人仲揶揄傳統航空公司嘅服務，同廉航冇分別。導演雲翔今日遭遇到去到登機口，睇住閘門閂航空公司都唔等嘅情形。

雲翔事後接受電話訪問時表示，今日要搭國泰同港龍聯航嘅KA104班機，到尼泊爾嘅加德滿都開會，佢話：「班機7點鐘飛，我5點左右到機場check in完，當時仲未公佈登機閘口。因為我坐商務位，所以去咗國泰就近嘅商務lounge，邊食邊等。」雲翔話大概6點40分至宣佈登機（boarding），當時佢即刻由lounge趕去閘口：「閘門喺68號，所以我都行得好快，但始終要等車過去。趕嘅途中仲見到位航空公司職員舉牌，已經係『last call』，我亦好肯定佢知道我趕緊去。」雲翔清楚記得去到閘口時為6點50分左右，閘口已在緩緩關上，仲聽到閘口嘅職員笑笑口話「呢位小朋友（雲翔）啱啱趕唔到」。

在多番理論之下，睇住閂門嘅雲翔當然都係上唔到機，雲翔話：「我係質疑點解得10分鐘boarding時間咁短，同埋佢哋都話打過去lounge，亦都知道我過緊去，點解都唔等個客？佢哋同我講唔等嘅理由係『今次班機完全冇delay所以唔等你』，好似好值得驕傲同理直氣壯咁，幾荒謬。又有位高級男職員話，要投訴就同佢講，仲話國泰冇投訴熱線，只係得電郵。明知佢哋唔會覆，都費事打字。好在我冇行李，咪同啲朋友呻下囉。出年我唔再坐國泰，會用腳投票轉坐日航。」

精選娛聞，喺晒《娛果》 http://fb.com/appledailyent