王維基今個月11號宣佈用50億出售佢電訊業務嗰晚，俾本報記者影到佢同一個中女去大坑嘅鮨辰食日本菜慶祝，之後王維基仲揸車送中女返北角渣華道港濤軒香閨，又親自送上樓，記者等到深夜都唔見王維基離開。原來，當日同王維基撐枱腳嗰位中女來頭唔細，佢就係曾經捲入唐英年感情缺失風波嘅唐唐前政務助理、現任香港總商會總裁袁莎妮。

陪住動土

聽講王維基同袁莎妮不時都會飯局，今年2月王維基喺將軍澳嘅多媒體製作中心舉行動土禮，袁莎妮都係主禮嘉賓之一。不過，當記者向王維基查詢嘅時候，佢只係透過城市電訊發言人鄭小姐話，嗰晚係同一個識咗好耐嘅朋友食飯，完全冇提嗰位係袁莎妮。
噚日馮仁昭再打電話畀城電發言人鄭小姐，佢認咗當日同王維基撐枱腳嗰位係袁莎妮，仲話佢哋識咗好耐。馮仁昭覺得有啲奇怪，如果只係朋友關係，王維基當日大可以大方講句：「我嗰日同袁莎妮食飯。」根本唔駛收收埋埋。再講，當日王維基好熟「架步」咁將部車泊喺袁莎妮屋企大廈停車場，然後又㩒埋，差啲以為王維基返自己屋企呢！