好快update一下曾推介嘅股份︰錦藝（565）發紅股除權日期推遲至本月中，睇實50日線，逢低吸納等再破頂；先達物流（6123）自動波破位，睇嚟賣盤有好消息跟尾，斬邊留邊最穩陣。

華富國際（952）停牌，有望再搵到戶好人家，同業威華達（622）及富強金融（290）聞雞起舞，券商股有價有市乃不爭嘅事實。下一隻接力炒嘅，我睇好賽特（153）。「喂！賽特做鋼結構同預製構件喎，關乜事呢？」是咁的，賽特上星期宣佈，有意收購兩間港資資產管理公司不少於九成股權，總代價不超過7,500萬銀，一間有4號（就證券提供意見）及9號牌（資產管理），一間就4、9號外仲有埋1號牌（證券交易）。通告指進軍金融業可為建築項目提供融資支持，如果落實收購，會設立金融服務部門，專注於香港提供多種金融服務，呢個伏筆值千金！

睇番基本因素，賽特現價市盈率僅三倍，股息率達3厘，市賬率0.5倍，變相半價大平賣，如果今次轉型成功，隨時十倍奉還，而家處於上市水底價，潛在回報肯定遠大於風險！

唐牛

掌握財經生活資訊，即Like「蘋果ATM」fb專頁啦！
http://fb.com/appledailyatm