李嘉誠休都退埋，又再被指「真跑了」，擺明講俾全世界知，今時已不同往日。攻心為上，有甚麼好得過，打殘香港曾最引以自豪嘅「超人」？

問題係，商人拋售獲利，善價而沽，屬做生意基本邏輯。就算最蚊型Startup，亦要先獲利，有cash flow，長遠至能談論資產增值、成長空間。

但偏偏，唔少Startups朋友，或深受Steve Jobs影響，或根本早已上岸，或者信心爆棚，佢哋未必唔信獲利，卻更重視增長、追求估值，創辦人H係其中表表者。

H檔生意，係香港數一數二，內地亦有業務，喺行內叫做「有朵」。創辦至今3年，就曾經有張幾億嘅支票，擺喺佢面前，但佢完全不為所動。

點解？H係性情中人，轉數快，說話直腸直肚得嚟有說服力，但為人和善，朋友不乏達官貴人，籌幾千萬沒有難度。佢深信，公司價值遠超幾億港紙，目標至少去到獨角獸，到時連孫正義亦要揾佢傾計。

有次同H飲酒，講到李嘉誠。

H話，佢認為李嘉誠無疑係頂尖企業家，遊走全球政商界，能夠得各方敬重，絕對唔容易。但佢認為，李嘉誠咁多年嚟，都係做deal、玩資本遊戲，並無真正create value，巔覆過傳統規則。若跟Steve Jobs、Elon Musk相比，未免唔夠visionary。

聽落好似有啲道理，但我唔完全認同。

首先，曾任石油分析員嘅孫柏文就講過，李嘉誠第一桶金，塑膠花，係50、60年代而言，正是世界頂尖科技、新興行業，從未有人做過。佢難度在於，點樣將一塊「硬膠」，透過科研同技術，生產出柔軟、有色澤同栩栩如生嘅產品，例如膠花。而這技術，當時連外國人都未必做到，李嘉誠已係亞洲第一。

再者，李嘉誠過去幾年，投資唔少合成生物Startups，由人造蛋、植物牛肉到最近的份子威士忌，邊一樣唔係極具巔覆性？H檔生意，估值要突破獨角獸，亦要有個孫正義賞識。

Steve Jobs同李嘉誠，一個捲起衫袖自己做，一個投資人哋做，代表兩條完全唔同嘅路，兩者冇得比較。但可以肯定，行Steve Jobs嗰條路，預咗自己會短命啲。如果真要二揀一，我跟李嘉誠。

尹思哲
http://linkedin.com/in/wanszezit

investMAN
For People of Style & Substance
掌握理財智慧 感受生活品味
http://facebook.com/investMAN.hk