肥龍、詩姐姐同林D9日日為政改第五號報告書頭疼，唔知寫啲乜先至好，寫得太快怕北京唔制，太慢班民主派一定擰頭，攞唔到立法會三分之二票，只有四大皆空，但係想原地踏步都唔係好掂，因為咁違反咗《基本法》要循序漸進嘅精神。

交流會「雙向溝通」

所謂左右做人難，八方都唔知煲呔同肥龍點落台，不過，唔使驚，皆因煲呔有位同宗曾慶紅副主席喺北京照住。八方聽聞曾副主席位中學同學（當年一齊喺北京101中學讀書）兼親信朱育誠，最近同班法律專家落咗珠海擺陣，想親自聽取港人對香港民主化以及未來政治發展嘅睇法。當然呢啲交流會唔係單方面進行，即係唔係只得你啲香港人講，重要聽吓啲京官嘅高見。
香港政制發展本來就係國防同外交以外、屬香港自治範圍內嘅事，𠵱家由中港兩地專家去研究，如果唔互相體諒，大局為重，緊跟《基本法》「一國兩制，港人治港」嘅精神，就一定翻艇。試問從未嘗過真正西方民主為何物嘅共產黨員，如何可以理解港人嘅所想所求？
「讓香港人先民主起來」同「讓部份人先富起來」同樣需要領導人有高瞻遠矚嘅能力同埋廣闊嘅胸襟，當年鄧小平做得到，今日嘅胡溫曾能唔能夠繼承並發揚光大呢？

南下必有重任在身

講番曾副主席位朱姓同學，佢以前由北京派駐前新華社工作，八八年起由副秘書長做到副社長，做足十年，重跨越九七㖭，回京後任北京政協副主席，九九年當上台港澳交流促進會會長。○三年港人反23條五十萬人上街大遊行後，北京痛定思痛，派剛全退嘅朱育誠喺國務院發展研究中心下面成立一個港澳研究所，自任所長，直接向曾副主席交報告。
朱育誠受命於危難之間，當然係大權在握，佢今年四月就曾經同胡漢青做主席嘅基本法研究所一齊，就釋法機制進行乜嘢民間討論喎。今次朱老兄南下，一定有任務在身，可能係為曾慶紅做先頭部隊，探聽吓港人對政改嘅不同意見，同時亦為特區把脈，唔通咁重大問題，靠晒肥龍同中聯辦高祀仁咩。
所以各位如果最近碰到啲香港政經界人士或者專家學者頻頻出入澳門，千祈唔好誤會，佢哋可能只係路經此地去珠海朝聖，唔係去幫襯燊哥或者金沙是也。

傳真︰2623-9278
電郵︰[email protected]