【道德兩難】西班牙少年隊狂派25蛋 點解教練要被炒?
小學生西班牙教練少年隊BenicalapSerranos CD
【新增動新聞】
球隊成績差劣,教練引咎下台是常識吧,但如果領軍大勝25:0反而被炒,當然要疾呼「公平咩」啦係咪?喺一場西班牙10至11歲組別地區聯賽,曾經出產前利物浦後衛荷西安歷基嘅Serranos CD,面對賽前錄得全敗、勁失247球嘅Benicalap完全冇留手,半場領先15球下大勝25:0,連門將都整番兩球「贈興」,點知球會竟然決定提早解僱原定季尾離隊嘅教練!
有球會內部人士向西班牙傳媒解釋炒魷背後原因:「我哋而家講緊小學生之間嘅比賽,着重價值多於入球。我哋不斷嘗試傳遞要尊重對手嘅訊息,呢個比分差距本應可以更克制,因為講到底,要一位11歲球員失25球後返屋企確係相當難受。」呢位消息人士賽後仲親自道歉,獲得對手接納並會轉達畀一班小將。為教練辯護嘅律師就反駁指,佢嘅當事人並冇刻意提倡盡數對手,只係因為對手冇球員調動之下繼續狂攻,令後防暴露太多空位先導致呢個戰果。
其實呢類「保護」小球員嘅措施喺西班牙並唔罕見,例如有賽會喺10:0過後唔會繼續計分,亦有賽會規定超越某個比數後,進攻一方必須造出指定次數嘅傳送先可以起腳。不過,所謂「尊重對手」,到底應該係全力以赴認真較量,抑或適當留手互相畀面?睇嚟係永恒嘅道德難題。
Serranos CD少年隊大勝25:0,教練竟然被炒…