今日D奶o靚模羅子喬(Bella)無端爆料話所屬嘅經理人公司、即施念慈旗下嘅加秀娛樂要求佢出席一啲「飯局」，佢堅拒並要求解約，就話有人同佢講會將佢封殺。施念慈方面今日就發出聲明否認，仲話羅子喬言論失實及具誹謗性。

施念慈公司旗下嘅陳靜(DaDa)今日就出席電影首映活動，佢當然知道今日出現會引嚟追訪，可能因為咁今晚有成2個助手陪佢到場，做訪問時兩個人依然企喺佢旁邊傍實。

問DaDa有冇留意師妹嘅新聞?佢就句句有骨咁話:「今日公司都發咗聲明，自己唔方便講咁多，不過對於不實報道，已經交咗俾律師去處理，今日我係嚟宣傳電影，係開心事，唔想幫人哋宣傳。」心情受到影響?佢話:「冇喎，覺得謠言止於智者。」怕唔怕引人遐想，覺得你都有去飯局?佢話:「唔驚，我嘅努力相信大家會睇得到。」同Bella熟唔熟?DaDa話:「同佢同公司，我對每個女仔都係一樣，大家都係工作嘅伙伴，希望件事可以好快解決，留返俾公司去處理。

記者話佢都係「過來人」，之前「引退」都傳佢同公司拗撬，DaDa反應好大話:「唔係!嗰時我係生病呀，係兩樣嘢，係唔同嘅事，希望大家可以分返開。」但嗰時就係傳佢要去飯局所以先有病，DaDa繼續話:「梗係唔係啦!哈哈，我係因為拍戲壓力大，始終係女仔呀，有啲心理因素影響，呢幾年經理人成日鼓勵我，經理人絕對值得信任，同埋自己絕對信任佢哋，公司亦唔係佢(Bella)所講嘅咁，公司好值得信任。」

咁同Bella有冇聯絡?DaDa話:「一向冇乜聯絡。」但娛圈成日有呢啲飯局傳聞，DaDa話:「自己有聽過，冇受過邀請，好似微博嗰啲都唔會理佢。」問佢微博係關於乜嘢?係咪出價?佢就承認微博有人邀請，咁開咩價位?DaDa就話未有咁深入去聽，但係成日都有啲不雅騷擾相傳過嚟。但強調冇人邀請過富豪飯局，話自己入行時改晒電話，所以冇人搵到佢，佢話:「嗰件事(引退)發生之後，我又再改多次電話，所以減少騷擾，對呢啲一笑置之。」

問佢今日件事發生後有冇同施念慈聯絡?DaDa話「都有，我同佢講謠言止於智者。」施念慈有冇教你點答?佢話:「佢同我講，話會出份聲明，一切都交俾律師處理，O依家係關於法律，就交俾律師，自己唔方便講。」

同場嘅艾威就同港視已經完咗約，o依家係自由身自己接嘢做，佢話主力係電影，問到王維基話開劇?佢話:「係咪o架?好似仲考慮緊啫，如果佢開劇都會係第一時間考慮。」

不過講到港視開台個勢好好但o依家下滑，佢就話:「好可惜，好多同行都覺得可惜。」問到現時工作量，佢話:「都ok，都未停過，其實好多謝HKTV，有啲電影都係經HKTV接。」問佢會否再簽經理人，佢就話傾緊，係內地定香港?佢話:「冇所謂，因為o依家冇乜分香港同內地。」