當年今日
關於我們

股壇瀏覽器:粵投唔會白犧牲

蘋果日報 2003/08/20 08:00


美股周一雖然造好,但升幅唔算太大,杜指只升90點,搞到港股噚日無以為繼,午後尾段沽盤突然急增,有傳聞話長和系中期業績唔睇好,恒指倒跌15點,收報10509,成交高達139億元。此外,阿虎收到料美股周二可能遇到較大沽壓,因為近期債息上升,可能吸引基金換馬沽股票,轉買債券。
睇嚟中央真係無所不用其極挽救香港經濟去挺董,除CEPA種種優惠外,重要迫廣東省調低東江水水價。東江水項目是廣東省重組粵海系債務時注入粵海投資(270),一旦降低水價,勢將影響粵投收入,以及股東和債權人利益。
有消息話,港粵會就東江水另訂新條款,就係香港用幾多畀幾多,唔使好似𠵱家用唔足都要畀錢。對粵投而言,新條款一定冇原有條款咁着數,不過粵投股價噚日依然企穩,收1.38元,升0.73%。黑客叫阿虎放心,佢話中央郁得粵投條水,日後梗有着數益番佢,唔會叫粵投白犧牲咁唔公道,否則日後重有邊個肯聽中央支笛?不過,大家想聽好消息可能要耐心等候,到時其他中資股可能已炒咗幾轉。

電盈傳有大動作
電盈(008)股份早前出現兩次大型批股後,股價一直冇起色。e莉莎話,聽講大戶收集得七七八八,遲啲可能會有大動作。電盈最近打算再推出收費電視,跟住又話想私有化合縱連網(8107),但呢啲都唔算大型發展,除咗將機樓資產包裝為REITs上市之外,阿虎都唔知電盈重有乜嘢法寶。
阿虎