張敬軒、楊洛婷、葉蘊儀等今日在沙田馬場出席香港國際賽事，軒仔在馬匹亮相區獻唱三首歌，相隔十年再喺於馬場獻唱，佢笑指感覺似匹馬企喺場中畀人欣賞。

軒仔話間中都會向精通賽馬嘅朋友搭單下注，亦有所斬獲。軒仔話自己都識騎馬，問有冇諗過成為馬主？佢話:「嘩，咁遠，希望有呢一日，我嘅願望係想拉頭馬。」早前曾被指貌似南非騎師麥偉利，軒仔笑言今日有多重身份，佢話﹕「我除咗係沙田麥偉利，亦都係西營盤彭于晏，我啲女仔朋友知我今日見到彭于晏，問我可唔可以做我助手嚟影相。」軒仔又大讚彭于晏集男人所有願望於一身。

日前喺網上惡搞謝霆鋒Chok住唧朱古力整甜品嘅片段（相關新聞： http://bit.ly/2jfDozd ），軒仔笑話:「大家一見我就嗌我『生麵王』，嗰日同鍾舒漫喺郵輪表演，之後喺甲板打邊爐，而霆鋒條片最吸引我嘅係佢膊頭條鬚，我就諗起一係用烏冬，但最好係生麵，點知佢又有，仲要我件褸可以攝到。」拍片後，軒仔第一時間同霆鋒備案，並叫對方唔好嬲，霆鋒回覆﹕「點會傻瓜」。

另外，擔任活動司儀嘅楊洛婷低胸現身，豐滿上圍經常被問係咪好夠奶水？佢話再多都唔及兩個月嘅囡囡咁好胃口，試過一餐飲咗十一安士奶，佢話:「佢頭細身長，阿Tim(老公)話係model身型。」嚟緊佢會跟媽咪同囡囡返加拿大過聖誕同除夕，最開心係弟婦剛剛生咗BB，此行既幫愛囡舉行百日宴，弟弟嘅BB都滿月，而阿Tim就要出席完頒獎禮，明年1月初再飛往加拿大會合。

更多娛聞，喺晒《娛果》
http://fb.com/appledailyent