【淺水灣】陳豪同陳茵媺（Aimee）6年前結婚，話咁快𠵱家已經生咗兩仔一女，Aimee仲退出幕前專心湊仔，不過有時陳豪唔使開工，都會幫吓手，一齊去接送啲仔女返學。日前下午3點幾，兩公婆就趁未使接放學，偷閒去淺水灣嘆下午茶，仲巧遇正喺嗰頭食飯嘅胡定欣。

陳豪同胡定欣合作多次，包括《鬼同你OT》及《來自喵喵星的妳》等，自然老友鬼鬼，原來早喺2012年，Aimee都同定欣合作過拍劇集《大太監》，三人難得碰面，自然有不少話題。陳豪點咗自己嘅招牌飲品咖啡，老婆Aimee亦夫唱婦隨，同老公齊齊嘆咖啡，其間三人發現有記者，都好有禮貌咁同記者打招呼。

對於撞到好友，胡定欣似乎相當高興，佢邊食邊講，傾到手舞足蹈，不過陳豪同Aimee逗留咗半個多小時就要走，可能因為要趕住接仔女。臨走前三人玩自拍，陳豪似乎玩到失晒魂，當兩公婆去到門口準備離開，就俾胡定欣叫住，原來大懵嘅陳豪漏低咗手機，好在胡定欣提佢咋。其後Aimee喺Ig貼出自拍照，用英文留言「今日去接仔女遇到定欣好開心好驚喜，我仍記得我哋一齊喺橫店拍《大太監》……妳係我飲紅酒嘅酒腳，我掛住妳。」原來Aimee同胡定欣咁老死嘅！