現年22歲的南非馬壇新星麥偉利，上季中接過馬會受薪董事韋敦彥的來電，邀請他再次來港客串時，麥偉利毫不猶豫，馬上答應入紙申請。

當時，潘頓和莫雷拉正為香港騎師冠軍寶座鬥得你死我活，外界仍未知道今莫雷拉季離港赴日發展。

麥偉利在前季（16至17年度馬季）曾短暫客串個多月，僅得四場頭馬，深知香港搵食艱難，卻偏向虎山行，毅然再度來港，誓要闖出名堂。

問起麥偉利再度來港發展的原因時，他答道：「16至17年度季尾，我首次嚟香港策騎，雖然只得短短個多月，但完成合約後唔夠兩個星期，我已經知道自己非常渴望再喺香港策騎。」

他續：「年幾之前，當時我只得20歲，啱啱喺南非『畢業』，由見習生升格成大師傅，自己嘅世界就只得南非，當時應邀嚟香港就好似一次畢業旅行，好想見識、感受一下新文化，心理上唔係百分百投入賽馬，如今睇番，覺得當時心態好唔成熟。」

當時在港客串，麥偉利上陣100次得4冠1亞5季，其中兩場頭馬卻是國際三級賽，包括「永旺年年」爆出89倍巨冷捧走沙田銀瓶，此駒之後卻不再上名並退役。

還有令全球馬壇震驚的精英碟，1.2倍一面倒大熱門「巴基之星」在開閘後200米突然罷跑，麥偉利的「馬上發財」漁人得利，爆出12倍半冷掄元。

麥偉利說：「我好幾場頭馬都係有幸運成份，另一場頭馬『泡泡達人』只以第二名過終點，但首名衝線嘅『高山威龍』阻及其他對手而被貶落季軍，我駒升上首名。」

「但有時行好運都有壞處，部份練馬師覺得我仍未證明到實力，呢四場頭馬都係半冷或冷門，我明白佢哋安排勝望高嘅賽駒出賽，起用我可能有所猶豫。即使新季莫雷拉唔再喺香港策騎，我要爭取支持仍然因難。」