【新增影片】

今晚（6日）係快活谷馬房嘅開鑼大日子，同時都係位於跑馬地馬場，以本港名駒「同德」命名嘅餐廳，亦選擇今晚作首日開張。

用得「同德」呢個名做餐廳主題，自然當年嘅主理騎師告東尼、練馬師王登平及馬主崔德剛、崔德宣，都有到場主持大局，仲響馬會市場及客戶事務執行總監張之杰陪同下，齊齊做開幕儀式嘉賓。

馬主崔德宣就大講當年「同德」嘅歷史，表示呢匹前馬王身價只係一萬蚊澳紙，非常超值，但馬匹嘅脾氣甚大，多得練馬師王登平悉心嘅訓練，及告東尼喺陣上出色發揮。

而告東尼表示「同德」實力好超級，但有一件事令佢至今都好後悔，就是一次快活谷賽事中，「同德」贏得太勁，贏過對手二十多個馬位，覺得贏得太遠。

位於跑馬地馬場大看台一樓嘅「同德」餐廳，以機場貴賓室為藍本，全場掛咗好多「同德」威水相同歷史，踏出露台更可以一覽全條跑道嘅景觀。Wi-Fi上網、48吋高清電視呢啲基本嘢當然唔少得，仲加埋設有iPad、耳機免費借用服務，服務認真貼心。