今晚（21日）為季內倒數第三次谷草賽事，快活谷現場開跑後，就連一滴雨都唔見有，所以場地掛牌於第二場起，由好地至黏地，變為好地，競賽董事小組更認為這項更改應具追溯力。因此在正式賽果上，第一場的場地為「好地」。馬會亦按計劃第4場後進行壓地。

頭四場已跑完，谷草走勢終於唔再偏利前置馬，除咗雷神第3場1200米贏「勁皇子」全程守前三位外；其餘1、2、4場冠軍馬一律都喺直路從後殺上，故此揀啲好似「巴基之星」嘅後勁馬就啱晒。

練馬師方面，最有手影一定要數神仙蔡約翰，事關佢憑「勁皇子」嘅勝仗，已平咗告東尼一季最多贏馬紀錄，頭四場他只出兩駒非冠即亞，呢位冠軍練馬師下半場有五場「威風霸皇」、六場「精算追擊」及八場「話得事」，必須重視。