證監會上個禮拜五公布旗下諮詢委員會委員嘅新名單，原本冇乜特別，不過，喺唔再續任嘅舊人中，有港交所行政總裁周文耀，同埋港交所董事陸恭蕙嘅大名，但又冇補番港交所嘅代表入去，唔通證監會同港交所真係冇乜偈傾？定係周總裁就快退休？
翻查資料，周總裁早喺01年6月已獲委任，當時佢仲喺滙豐打工，未返港交所。之後兩度獲委連任，一共喺證監諮委會坐咗6年，都夠皮要走。至於陸恭蕙同樣唔經唔覺做咗6年，但佢上年先被選為港交所董事。內裏有冇其他含意？
或者只係華華多心，不過，證監會同港交所一直都唔係好啱嘴形，最近嘅惹火事件，係對檢討雙重存檔制度嘅態度，一會一所唱反調。皆因新股來港上市，將上市申請畀完港交所又要畀證監會，港交所覺得咁樣拖慢咗審批過程同嘥時間，會削減競爭力，都係時候檢討吓；但證監會就唔認為呢個係問題，可以唔使咁快檢討住喎……大家喺呢個問題上一直未有共識。