國際會計師公會噚日搵咗香港經濟大師張五常教授（圖），喺午餐會以香港與上海誰領風騷為題目演講，八方恭陪末座聆聽大師高見。大教授話：「最頭痛係香港同上海時間相同，但上海嘅日出早一個鐘頭。美國嘅紐約就因為咁贏咗芝加哥。如果摩根士丹利嘅主席去晒上海做，香港會好傷呀！」
張五常提到香港同其他城市競爭，都幾鬼肉緊，關於開賭問題，佢認為：「唔使錫住澳門喇，阿松都應該心郁郁，你哋去叫佢喺迪士尼樂園隔籬開檔，反正機鐵冇乜人坐。」
大教授又批評政府，數碼港、中藥港亂噏幾百樣，梗有一樣中……香港𠵱家物價、樓價同工資都係太高，要繼續下調：「九七年前，曾蔭權話我知，要加公務員人工7%，我幾乎要開聲鬧佢；重話要做強積金，簡直係自殺。」


傳真︰2623-9278
電郵︰[email protected]