星期三（19日）難得休戰，有時間講吓題外話，今季所有練馬師都成功上岸，換言之沒有人收警告信，又可以順利過渡。來季副練大執位，相信最令人期待會係韋達和薛順強組合，十三屆冠軍騎師首度開倉做練馬師，配上最具朝氣、騎得又做得的薛順強，能否打破奧運馬房的魔咒，繼而成功交出好成績？大家不妨拭目以待。

根據過往成績，奧運馬房成績的確差強人意，就算環境設施如何美輪美奐，馬房又大又新，泳池又靚又乾淨都好，位居此地的馬房成績始終未如理想，早期的孫達志、胡森連續不達標被踢出局；今季初麥菲文亦提早離場，無巧不成話，總會教人無限遐想。加上仍然奮鬥中的霍利時、鄭俊偉，同樣處於捱打狀態，究竟韋達以一個初哥身份，有何辦法去克服呢個重大難題呢？

明知山有虎，偏向虎山行，相信局內人必定明白問題所在，但係舊馬房位置所限，又有裝修工程，根本無法去設定一個有利位置予韋達。

地理環境在沙田馬場來講非常重要，就算開倉有六十匹都好，安排操練程序、時間和人手都係問題，究竟十三少可以做到幾多呢？副練又可以幫到幾多呢？新馬多已是意料中事，要花多少時間才可以進入作戰狀態呢？

上述種種問題，作為投注者，都係持觀望態度比較穩陣矣。

-----------------------------
你撐蘋果 我捐$1
支援反送中抗爭者