話晒係澳門猛人，堂堂太陽娛樂老闆周焯華(洗米華)，身邊美女自然如車輪轉，可以留得住佢個心同「華種」嘅人，當然，亦唔會只係得MandyLieu一個。原來天生明星相嘅洗米華，曾經同陳雅倫、Mango王秀琳仲有2011年亞姐冠軍「BingBing」馮雪冰都做過好朋友0架。

先講下Mango——冇錯，就係09年爆出郭富城「偷芒」嗰個Mango王秀琳，喺娛圈多年一直撈唔起，但異性緣特旺，識親嘅都有番咁上下份量，除咗城城，仲有就係洗米華。

今日有周刊報道話，2012年，Mango同有米男友唐堂偷食台灣索模白歆惠，咁當然係即撇搵過個啦，有傳佢當時就同洗米華「華麗邂逅」，做埋好朋友——拿，嗰陣時洗米華已經同正印陳慧玲註冊結婚0架喇。

消息就話呢，當時洗米華打本千萬，俾Mango喺中環開日本餐廳，而且仲好貼心咁，幫呢位女性好朋友谷生意、介紹唔少朋友去餐廳幫襯。間餐廳6月開張，嗰陣Mango就話係同朋友合夥，又聲稱同8名股東合資開設夜店。明明job唔多，何以生財有道咁疊水？當時Mango就話係靠買賣物業賺番嚟，仲話﹕「我一直都想投資做生意，想自己獨立啲。」仲話明唔想靠男人。同年10月，Mango就被爆偷食「Lam仔」林德信，之後又陸續同不同異性約會斷正，但大多只屬冇米粥，不過Mango做生意真係醒，早排先至仲將餐廳改為居酒屋，繼續吸客。咁識轉型，難怪長做長有啦。