日本富士嘅55周年台慶劇《年輕人們2014》噚晚終於首播，妻夫木聰、瑛太、柄本佑、野村周平、滿島光扮演5兄妹，大玩當年《同一屋簷下》嘅親情故事，再加埋長澤正美、蒼井優、橋本愛助陣，陣容之鼎盛真係近年少有，矚目程度都拍得住木村拓哉下星期播出嘅《律政英雄2》。

扮玉女起家嘅長澤正美，呢次為《年輕人們2014》挑戰車房妹角色，佢一身爛撻撻嘅煲煙場面早已公開，至於同妻夫木聰飾演一對嘅蒼井優，第一集已經有唔少內心戲，不過論到最搶戲，估唔到竟然係憑《告白》上位嘅橋本愛！

18歲嘅橋本愛一向惜肉如金，點知佢同扮孻仔嘅野村周平喺劇中拍下唔少大膽閃卡，出浴、床照、肉搏乜都齊，但都刺激唔到收視，關東區嘅首集收視只得12.7%，以咁嘅卡士嚟講成績真係好一般。