鄧萃雯、張崇德同林曉峰今日喺青衣城出席「擁抱家．快樂爸」活動，張崇德仲帶埋11歲嘅大仔張日希齊齊出席。

鄧萃雯因為父母離婚，自小冇爸爸喺身邊，佢直言好影響到自己。鄧萃雯自爆初戀嗰陣，好想搵個似男友又似爸爸又似老師嘅人，佢話：「呢樣嘢真係影響我一生，爸爸係比較花心嘅，佢兩段婚姻都失敗，所以我到o依家都唔結婚。」佢坦言自從信主，有天父代替地上父親嘅愛，先令佢越來越有安全感：「我都等緊個好嘅，所以爸爸唔好睇少自己力量，你想個女第時搵咩男人，你就要做個榜樣先。」

至於工作，雯女就透露睇緊個幾啱嘅劇本，因為角色好有新鮮感：「唔使做師奶、太太、媽媽，有愛情線，乜都有啲，對手仲係未合作過嘅。」

張崇德話早幾日囝囝張日希小學畢業：「自己都感動，因為佢學校係6年班同12年班（中學）一齊行畢業禮，諗到第時仔仔會咁樣，同埋見佢讀得好開心，就知自己當日冇揀錯。」提到日前小一派位，張崇德笑謂自己冇經歷過：「仔女都係讀直資學校，一路直升，所以我哋就輕鬆啲。不過身邊好多朋友都話入到第一志願，佢哋都好開心。」

至於嚟緊父親節點慶祝？佢就話冇咩特別，平日仔女都好錫佢：「都係一個節日揾啲節目搞吓啫，不過有年，佢兩兄妹一齊整咗個心型pizza畀我，真係好冧。」

精選娛聞，喺晒《娛果》
http://fb.com/appledailyent