認唔認得呢位沙排球手係邊個呀？佢就係盛傳曼聯好有興趣羅致嘅國米克羅地亞中場比列錫囉！原來比列錫唔單止踢波叻，打沙排亦有一手，喺星期四仲首次代表克羅地亞國家隊喺一項國際沙排賽事上陣，不過，由於對手嘅巴西組合曾經出戰去年夏天嘅里約奧運，實力太強，所以比列錫同拍檔直兩局輸咗。嘩！比列錫咁多才多藝，如果佢真係加盟曼聯，紅魔可以諗諗整多支沙灘排球隊喎！