古巨基入行20周年，佢將會喺10月7至9日喺紅館舉行個唱。噚日佢喺W酒店開記招，大會先安排七個着住婚紗嘅女模特兒上台，隨後基仔一身白衫出場，與一眾女模拖手合照，最後更應記者要求，畀女模錫佢塊面，基仔笑得好開心。原來呢個係基仔嘅構思，佢話：「今次演唱會以樂園為主題，其中一部份，我想搵七個唔同國籍嘅女模特兒上台，喺城堡有個愛情故事，可能好似童話愛情故事，錫咗先醒，到時有七個公主，我暈七次。」唔知到時佢個緋聞助手女友Lorraine會唔會扮公主上台，佢話：「你哋問吓佢肯唔肯，佢肯做我肯演。」不過，基仔唔會效法其他歌手喺台上突然宣佈結婚，亦唔太講感情事：「唔會喇﹗都未有呢個計劃。」

爛gag露股肌

演唱會仲有個大突破，基仔將會有一部份勁歌熱舞，佢話呢個係自己嘅大挑戰。問到佢會唔會露腹肌，佢搞爛gag話：「露股肌，因為我係古巨基。」佢仲話：「為咗呢部份，我應該會去韓國排舞。」至於會唔會效法草蜢等歌手，與女舞蹈員跳貼身舞，基仔話：「如果首歌配合，有需要我唔抗拒，呢個都係藝術嘅一種。」