唔係飲酒都可以杯上杯落，好似今日下晝沙田馬場咁，由第六場開始連跑三項國際二級賽，總獎金講緊過千萬港紙。馬主只要贏出其中一隻大盃，已經有七位數字過百萬頭馬獎金落袋，跑完馬散場去食晚飯，自然飲得杯落！

睇番今日三項國際級大賽，雖然唔似得月頭三級賽莎莎婦女銀袋有外地馬「阿方索」（澳門代表）襲港，但莎莎集團依然係今次主角，事關老闆娘郭羅桂珍憑名下叻馬「美麗大師」，同囝囝郭浩泉一齊捧走第七場馬會一哩錦標。加埋老公郭少明到場贈興，郭氏一家大細再次於馬場度過美麗的一天！