23:47更新
【阿仙奴0:0曼聯‧半場完】
雙方上半場都有唔少具威脅埋門，但兩邊門將施治同迪基亞有出色發揮，半場雙方互無紀錄。

23:32更新
【阿仙奴0:0曼聯】
洛賀丁幾乎出事！呢位年輕守將回傳乏力，朗尼截到個波單對單面對施治，射門竟然省中施治出界！

23:31更新
【阿仙奴0:0曼聯】
阿仙奴藉一次角球攻勢製造威脅，曼聯解圍不遠下俾張伯倫放冷箭，但迪基亞再次撲出！

23:09更新
【阿仙奴0:0曼聯】
迪基亞不讓施治專美！艾朗藍斯半單刀勁射遠柱，迪基亞落地快單手撲出。

23:05更新
【阿仙奴0:0曼聯】
曼聯第一個黃金機會，馬迪爾喺兩位槍手守將下窄位快腳彈射，俾施治撲出。

23:00更新
【阿仙奴0:0曼聯‧開波！】

22:48更新
睇完雙方陣容有玄機？足智彩賽前開出阿仙奴讓半/一嘅亞洲盤，目前已經轉到讓平/半，曼聯唔通有機？

22:47更新
【陣式解構】咖喱：大戰阿仙奴 摩佬堅出預備組小將： http://bit.ly/2pPRRSS

22:24更新
【利物浦0:0修咸頓】
紅軍失前4主動權！周日悶和修咸頓痛失兩分後，令利物浦的失分比曼市雙雄為多，且看曼聯會否把握機會擊退阿仙奴？

22:12更新
【利物浦0:0修咸頓】
計埋補時剩番唔夠10分鐘，紅軍就算先後換入拉爾拉拿同史杜列治都未有破門良策，唔通就咁嘔番前4主動權出嚟？

22:03更新
【阿仙奴vs曼聯，紅魔堅出新仔19歲守將杜安施比！】
阿仙奴正選陣容
門將：施治
後衛：洛賀丁、高斯尼、蒙利爾
中場：阿歷士張伯倫、艾朗藍斯、格列沙加、基蘭基比斯
前鋒：奧斯爾、韋碧克、阿歷斯山齊士

曼聯正選陣容
門將：迪基亞
後衛：杜安施比、菲爾鍾斯、基斯史摩寧、達美安
中場：米希達利恩、卡域克、安達靴里拉、桑馬達、安東尼馬迪爾
前鋒：朗尼

21:52更新
【利物浦0:0修咸頓】
科士打勇救修頓！「聖人」守將積克史提芬斯喺禁區內同奧歷治爭頂後疑犯手球，球證直指12碼，但占士米拿操刀射自己左方，俾費沙科士打完全捉到路！

21:46更新
【利物浦0:0修咸頓】
雖然修咸頓僅佔35%控球兼錄得零中框射門，但利物浦仍未能將優勢化為入球，餘下半個多鐘頭不容有失！

21:18更新
【利物浦0:0修咸頓‧半場完】
利物浦明明贏晒餘下3場就可以力保前4，但球隊今場攻勢隔靴搔癢，咁樣落去好難贏啫……高路普要諗諗計啦。

21:00更新
【利物浦0:0修咸頓】
紅軍開賽採取主動，但甚少具威脅埋門，暫時同修頓互交白卷。

20:30更新
利物浦VS修咸頓開波！

20:11更新
高路普定羅渣士勁啲？原來相比頭65場英超賽事，兩位新舊紅軍主帥一樣攞到33勝18和14負嘅成績，冇分高低！（@OptaJoe）

19:58更新
修咸頓上周五頒發球會年度最佳獎項，其中西班牙中場奧里奧爾羅美奧獲球迷選為最佳球員，主席挑選最佳球員就係日本守將吉田麻也，兩位今日雙雙擔正！

19:32更新
利物浦正選陣容
門將：米洛列特
後衛：尼達利基尼、洛夫雲、祖爾麥迪比、占士米拿
中場：安利簡恩、盧卡斯、韋拿杜姆
前鋒：菲臘比古天奴、奧歷治、羅拔圖法明奴

修咸頓正選陣容
門將：費沙科士打
後衛：薛迪索拉斯、吉田麻也、積克史堤芬斯、賴恩貝特蘭
中場：史堤芬戴維斯、禾特普斯、奧里奧爾羅美奧
前鋒：杜辛泰迪治、加比亞甸尼、保法爾

英超今晚將會上演兩場秩序，攸關爭前4兼來屆歐聯入場券一席位！早前8點半會有利物浦主場迎戰修咸頓，由於紅軍失分較少形勢佔優，只要餘下3場全勝就可以保住前4，今晚對修咸頓嘅第一關當然唔可以甩拖啦。不過，佢哋今季素來有「羅賓漢」風範，遇弱越弱下輸過畀般尼、般尼茅夫、史雲斯、侯城等球隊，唔知踢風流波等收「咧」嘅修頓，又算唔算弱旅呢？緊接11點就有萬眾矚目嘅「仙魔戰」，阿仙奴主場迎戰曼聯，就算唔計爭前4都係牙骹戰，肯定夠晒激。「槍手」嗰份「前4」劇本今季出現好多轉折位，目前形勢仲未樂觀，如果今晚失埋分就認真凍過水，唔知可唔可以趁曼聯周中有歐霸4強次回合後顧而全取三分呢？

英超今日秩序
時間　對賽　直播
8:30pm　利物浦vs修咸頓　now621台及樂視
11:00pm　阿仙奴vs曼聯　now621台及樂視