特首梁振英今朝出席行會前,慣咗喺答完記者提問去收請願信,全程跟實梁振英嘅「白宮發言人」、新聞統籌專員IC馮煒光,就喺CY到請願區接信時,突然喺有新聞處人員在場下,攞出私伙金色iphone6plus,拍低老闆收信情況,估唔到佢咁重口味,私藏老闆珍貴片段。
之但係呢,八方喺幾個鐘頭後,卻發現疑似由IC角度拍攝嘅請願片段,竟然出現喺梁粉網站「港人講地」facebook專頁喎。專頁聲稱,係收到「讀者」手機拍攝片段,仲撰文強調梁振英接信時絕非「急急腳」離開,而係「駐足細心」聽示威者意見喎。唔通「金鐘仁」呢次化身「讀者」,免費幫「港人講地」拍片呃like?
八方事後問過IC,段片係咪佢提供嘅啫?但佢唔肯正面回應,只係話呢個係佢「習慣」,想自己留個紀錄喎,又透露今日用嚟拍片嗰部土豪金,已經用咗近兩個月㗎嘞。
呢件事令八方諗起,港區政協圈子近日流傳,有特首辦中人搭路搵政協,希望喺兩會張德江見政協時錄音,有政協一口SayNo,反問點解要幫特首辦做嘢?據聞有此「留個紀錄」嘅特首辦中人既非CY亦非IC,仲有邊個對呢啲重要政協發言咁上心呢?