56歲影帝黃秋生自少與母親相依為命，甚少提及生父，因為父親喺佢4歲嗰陣，離開咗秋生兩母子，秋生係混血兒，英文名字叫Anthony Perry，父親係英殖時代香港高級公務員Frederick William Perry，去年秋生曾喺facebook貼出一張黑白全家福，希望網民可以幫忙尋父，之後秋生接受BBC（英國廣播公司）訪問，網民再次關注秋生尋父事件，根據秋生提供資料，秋生父親於1955年偕妻子Vera Marjorie來港，妻子生於1919年9月8日，兩人有一位77歲女兒Vera Ann、以及一對74歲孖仔John William及David Frederick(新聞連結： https://bit.ly/2pGSpKh )。

今日BBC報道稱秋生已搵到同父異母嘅兄弟John及David，74歲John指當時知道呢個新聞時，佢同David都喺遊輪上，係佢哋一位喺英國嘅堂兄弟send咗一個電郵嚟，話有一件敏感嘅事佢哋一定要知，當佢哋返澳洲墨爾本屋企時，就睇到BBC呢個報道，認得出相中人就係佢哋爸爸，才知秋生嘅存在，而John睇完條片就話：「我們對整件事感到非常驚訝。」

據報道指親兄John及David唔知道點聯絡秋生，佢哋通過電郵向片段中提及嘅一間公司「神戲劇場(DCT)」發電郵，稱自己同秋生係「half-brothers at least」，John喺報道稱佢哋都好想去見秋生，最終三人喺上周二(20號)於香港見面，秋生喺影片中都話經過咁多年，突然喺呢兩週內尋親成功，佢覺得真係不可思議。

John同David又指爸爸係喺1955年舉家嚟香港，幾年後返英國，John同David曾加入英國皇家空軍，爸爸曾於Battle of Britain服役，其後John同David搬去澳洲定居，爸爸於1988年離世，爸爸一直未有透露自己有另一個家庭，所以兩兄弟對事件一無所知，John同David指呢件事雖然瞞咗幾十年，佢哋有啲唔開心咁遲先知，不過相信爸爸若果知道佢哋能夠聯絡上會覺得安慰，更形容三兄弟係三劍俠。

而秋生喺報道話曾同患老人痴呆症嘅媽咪講起呢件事，當時食緊晚餐，媽咪突然停止進食，秋生對住媽咪講：「我唔會離開你，我仍然會喺度，之後媽咪繼續食嘢。」John同David逗留咗喺香港幾日，秋生有陪住佢哋，David希望之後有一個愉快嘅家庭聚會，讓秋生融入家中，因為秋生係佢哋嘅家庭成員。

此外，John同David對秋生嘅演藝生涯了解不多，只係上網睇到秋生係一個資深演員，曾演出過150部電影，David覺得無論秋生係一個演員定係一個工人，對佢哋嚟講係冇唔同，因為John同David都會嚟同佢相認。

精選娛聞，喺晒《娛果》
http://fb.com/appledailyent