今次(21日)快活谷夜馬八場，用利放的C欄跑道。蘇保羅馬房剛贏四場，相信已部署一手馬在現階段出擊，今次派五駒參戰，有幾匹都是實力狀態兼備之牌面馬，可繼續跟進。潘明輝次次有馬贏，已成馬迷熱捧對象。場地方面，快活谷去水系統甚佳，除非臨場落雨場地才有影響。

第三場四班1200米，「勁皇子」季內贏同程是排一檔慳晒位，直路透出都僅勝「帝勝之星」一頭位，表現唔突出，但蔡約翰四歲質新馬可以有進步，復課積極操練，賽前試大閘是馬房一貫出擊手法，該課閘跟放跑第二，姿態甚輕鬆。上仗排12檔落敗，今次抽四檔回配莫雷拉，最重要是對手唔強，有機會再建一功，一於等睇雷神表演。

同場「栗馳駒」季內用得少，上仗賽前試閘省騎走勢牽強，故落敗是意料中事，復課有番生氣，試大閘搶放末段唔斷，排位朝落草地快試，末段有加速力，狀態大有進展，是半冷佳選。「紅褲精神」連續四仗在同程爭入前四名，老馬有態無保留，爭入一席還可以。「獵狐者」上仗此程排外檔，選擇留後可理解，但沒有積極攝位找遮擋，沿途受約束下好鬥口，消耗不少體力，但入直路仍肯追，質新馬復課續進步，今仗做好走位留放，會有更佳演出。「金鹿」晨課表現平常，止於接近。「旅遊智者」拍跳唔曳可兼顧。