當年今日
關於我們

【傘運4周年】獄中獲「特別關注」 釋後思維扭曲 對自由感恐懼

蘋果日報 2018/09/28 00:03

政治犯楊逸朗佔中輔警

做過輔警、又是傘運後政治犯一員,楊逸朗(Joe)透露在獄中獲特別「關注」,言行要求特別嚴格;即使出獄後,要遵守監管令時間比例亦比一般釋囚高。離開牢房,他感受最深竟是自由帶來的恐懼,甚至想隔離自己,「我更加擔心一啲長達六年至七年嘅政治犯」。
第一眼見到Joe,除了一身更加結實的肌肉外,16個月的囚牢生涯,未有為Joe帶來翻天覆地的變化:靦腆而自信的笑容,緩慢卻肯定的語調,依然乾淨又簡單。他去年於區院被裁定串謀縱火罪成判監兩年,因行為良好扣減八個月、即三分一刑期後,兩個月前刑滿出獄。
Joe憶述在監獄時受到「特別待遇」,如服刑第一日已獲高級長官單對單召見,平日搜身要求特別嚴格,閉路電視更有人全程監控,「一啲行為好似喺工場健身咁,其他囚犯其實都有做,佢哋睇到就會叫囚友傳話畀我,話『喂唔好再做啦,因為CCTV睇到啊』,畀我感覺就好似Big brother is watching you」,變相連累整個工場都受人注視,「啲囚友就覺得我好麻煩,即使我想低調呢,都唔可以低調」。
按法例要求,提早獲釋釋囚要守不多於扣減刑期的監管令,定時報到及受監察,確保不再犯罪,否則要重回監獄。Joe引述其他囚友指,一般監管令約等同扣減刑期一半,他卻要守七個月,「個比例好長,感覺係想攞到盡」,但明白自己「喺人哋手上」只能服從。現時他按要求覓得一份兼職,日間工作,晚上做運動然後休息,作息規律,生活似逐步回到正軌,惟獨一事未能習慣。

從每日被人規管,到重新決定自己每一步,Joe稱出獄後竟對自由感到害怕,甚至會避開人多的鬧市,「好似太大啦個環境,好似太自由啦,呢個念頭係好恐怖嘅,係一種好可怕嘅扭曲嚟」。一年半時間足以損害自由意志,令他不期然擔心其他正遭受牢獄之災的抗爭戰友,「一啲長達六年至七年嘅政治犯,到時佢哋感受可能更加深」。
記者 佘錦洪

立會補選新聞,《蘋果》一網睇晒
http://bit.ly/appledaily1125