傳聞會喺女朋友昆凌生日求婚嘅周杰倫，經常被人發現周圍去恩愛拍拖。據報道周董同昆凌喺高雄地底喉管爆炸當晚，佢哋喺高雄嘅夜市行街，事後周杰向唱片公司報平安話返咗台北，噚晚，周董仲捐咗200萬畀因公殉職嘅警義消進行慰問！

噚日七夕情人節，呢對恩愛情侶繼續拍拖，就有粉絲喺台北信義區一間百貨公司，又見到周董再同昆凌拍拖喇！張相只係影到二人背脊，仲話周董低頭玩手機。粉絲仲取笑大熱天時周董著住低浪長褲，反而昆凌就騷美腿。

另一邊廂，何超蓮同吳克羣呢一對，噚日七夕各自喺呢個溫馨日子，喺微博放咗啲相惹人遐想。超蓮放咗一條片，係佢拎住一束氣球，露出一副冧樣甜笑喺度行。有網民留言就估負責拍嗰位一定係吳克羣，而且好多人仲祝褔佢哋七夕節快樂。

至於吳克羣呢，就齋影食物相，兩張相入面都舖滿食物，有齋麵、鹵水豆腐、鹵肉飯、煎餃、大豆芽菜等等，更語帶相關話：「大餐無需要昂貴，只要好味!」不過枱面一大堆食物，而且有碗麵仲係share咗一碗細麵出嚟，似乎佢係同人一齊食。睇嚟佢都唔係想食多幾碗麵，係見多某人幾面喇!