最近忙緊舞台劇《夕陽戰士》嘅黃秋生同演員馮志佑今日喺商台接受訪問，同時發聲明指有大陸觀眾遺失門票，之後疑喺網上高價約千七元（原價460元）買左假門票，最後向劇團求助。

秋生話：「嗰個人透過自稱二手網站買，呢個係炒賣，同埋乜嘢為之二手？用過先算係，我哋係有官方網站賣飛，可以喺演出場地門口攞。我哋好有人情味，有送番飛佢睇，人哋咁遠嚟。」撞正書展、黃子華開騷 而舞台劇票房滿意，秋生話：「死都要死得有型，演員做得唔好就搵窿，好彩佢哋都做得似返個人。」

講到舞台劇，秋生話觀眾反應好，而秋生話幾個男演員做得好，但馮志佑話每場秋生都會記低重點，之後要演員改善：「每次有2頁紙，有時我哋做唔到佢會示範，做到面都紅，佢要求高好嚴格。」另外，之前私生子William嘅新聞，秋生話冇影響做嘢，指阿仔已經喺大學附近搵咗屋住。

精選娛聞，喺晒《娛果》
http://fb.com/appledailyent