美國女子足球隊門將蘇露（Hope Solo）禮拜五爆料，指控前國際足協（FIFA）主席白禮達曾經作出非禮嘅行為。

蘇露嘅指控清楚講出咗事發地點同埋場合：「喺其中一年金球獎嘅頒獎典禮，就喺我行上台準備頒獎之前，白禮達伸手摸咗我屁股一下。佢嘅行為好似好正常咁，我係完全嚇到呆咗，但只能夠馬上冷靜落嚟，整理好自己嘅思緒，去頒獎畀我喺國家隊嘅隊友雲芭治（Abby Wambach），呢個係佢職業生涯最重要嘅獎，所以我將焦點完全放喺Abby身上。」

蘇露喺2013年1月係當年金球獎嘅頒獎嘉賓，負責頒獎畀2012世界足球小姐、美國女足嘅雲芭治。蘇露話頒完獎之後就無再見過白禮達：「最衰見佢唔到，等我無機會直接同佢講『以後唔好再掂我！』。」白禮達嘅代表喺報道出現後，向包括英國《衛報》在內嘅媒題發表聲明，形容蘇露嘅指控「荒謬」。

現年81歲嘅白禮達因為之前向時任歐洲足協（UEFA）主席嘅柏天尼提供200萬瑞士法郎嘅費用，喺2015年被FIFA禁止參與足球事務六年，刑期會喺2021年10月屆滿。白禮達由1998年開始，一直都係國際足協嘅主席。

--------------------
曼城主力球員已經進駐『BFB CHAMPIONS 2.0』！快啲建立你嘅藍月亮軍團啦！
http://bit.ly/2xrTKGM