教育局局長吳克儉有幾受歡迎，香港家長同教師心中有數，佢早前決定今年全港推新版TSA，大部份家長都媽媽聲，就連退休嘅匯豐銀行前副總經理劉智傑（劉Sir）亦火都嚟，喺自己facebook大鬧吳克儉，話佢唔肯放棄推TSA，仲要諸多解釋，走去改名叫做BCA，困擾校長老師，又要令家長學生操心。
劉Sir上個月喺facebook撰文，指出樓市有爆煲隱憂，成為市場一時熱話，原來佢唔只關心樓市、股市，教育都有留意。

心痛寶貝孫女

華華問佢點解老馬有火，劉Sir就話，只係想為全港湊緊細路仔嘅母親投訴一下。事實上，劉Sir亦有兩個寶貝孫女讀緊官立小學，TSA對佢哋都係切身問題，劉Sir着緊都唔出奇。
劉Sir提議，不如由教育局自己舉辦呢個評估，日期地點選定後，讓參加者自動報名，每一個參與者可獲得100蚊津貼，睇吓會有幾多人參加，劉Sir就估計肯定冇人自願參與。
歸根究柢，劉Sir認為，其實梁振英先係原罪，因為係佢委任吳克儉做教育局局長，佢真係好希望吳局長可以放過孩子！所以大家都應該明白，點解咁驚梁振英2.0做下任特首喇。

李華華
mailto:[email protected]