潘頓今季已贏113場，刷新他個人在港單季頭馬數目新高，目前僅落後莫雷拉三場而已。今期夜賽（6日）潘頓騎足八場，有五駒出自方廐，其中第一場「明昇」及第三場「自由飛翔」皆有勝望，有權起孖。

第一場五班1650米，「明昇」體重高達1225磅，肉身大舊馬宜多操多跑，而狀態通常會拾級而上，此駒出自上季的香港拍賣會，呢類馬在外地未曾試閘，但大部份成熟後都能夠贏馬，如今季已兩捷的「開心日子」。

「明昇」在港跑過13場，近仗表現開始有進步，上場跑田草1400米採用留前鬥後跑法，直路追勢強勁，只輸半馬位跑第四名。近日晨課試跑，大馬步伐輕巧，狀態是來港後最勇的一次，今場潘頓肯繼續騎，收復前失決心大。

第三場五班1200米，「自由飛翔」今季首戰贏過四班同程，級數高過一般五班馬，大前仗跑同程排外檔，沿途留居後疊，直路從內疊追上，末段造22秒97全場最快時間，表現相當出色。近兩仗在直路取位欠順，落敗不足為據，在五班好着數。

「自由飛翔」體重雖然只得961磅，但近期晨課觀感良好，馬身肌肉飽滿，而且落腳輕盈，彈力十足。上季孭131磅跑一哩贏馬，細粒馬亦孭得起重磅，今場降班跑即換上方廐殺手潘頓，擺明車馬搏殺求勝。