有過百年歷史嘅中環昃臣道8號舊立法會大樓，兜兜轉轉相隔37年終於回歸司法用途。大樓做完兩年翻新工程，變身終審法院，噚日正式開張辦公。呢棟1912年落成嘅大樓最初係殖民地最高法院，二戰期間被徵用做日軍憲兵隊總部，呢段戰爭歷史亦令大樓不時傳出鬼故，勢估唔到今次翻新工程期間，都有鬧鬼傳聞。
有知情人士向八方報料，講到似層層，話大樓地庫位置翻新後，會做展覽廳專講大樓歷史。喺地庫做緊裝修嗰陣，有幾位女工不約而同投訴話聽到怪聲，聽真越聽越似係女人喊聲，嚇到毛管戙。佢仲話搵過資料，日佔時期個地庫正正就係憲兵隊嘅刑房，曾經唔少人頂唔住冤死，「真係好邪㗎！」

買氣墊隧道押解疑犯

呢啲鬧鬼傳聞，真係信不信由你。而終審法院搬去大樓後，暫時唔畀記者入去，司法機構計劃舉辦公眾導賞團，仲有展廳介紹本港司法歷史，鬧鬼地庫將會係其中一站，但導賞團未有咁快接受報名。今次翻新工程造價達4.6億元，外貌冇乜大改動，內部就多咗唔少設施，包括兩個法庭、一個登記處、一個律師專用休息室及更衣室、4個會議室同一個記者室。
喺立法會年代，大樓面向遮打花園有兩個入口，其中一個改成被告入口，疑犯拘留位置有防彈設備分隔，附近嘅登記處亦都用咗防彈玻璃。據了解，終審法院仲專程買咗一條氣墊隧道，當有疑犯要押解到法院，就會用隧道連接囚車同大樓被告入口，疑犯全程唔見光。
其實呢個建築物喺1912年啟用時係當時嘅最高法院，日佔時期做過日軍憲兵總部，1985年成為立法局大樓，1997回歸改名立法會大樓。至2011年立法會遷至添馬艦，大樓重新裝修後回歸本源。而新標誌嘅字體同標誌都用咗藍色，反映司法機構嘅嚴肅與莊嚴，雖然大樓已經開始運作，但係到本月29日先有首宗案件。
有得去新地方開工，終審法院首席法官馬道立話自己特別高興，皆因司法機構可以用返有歷史意義嘅地方。終審法院常任法官鄧楨亦話，以前大樓仲係最高法院年代，喺度打過官司，好開心大樓變返法院。

李八方
mailto:[email protected]