有「東洋美斯」久保建英壓陣嘅日本U20，周日喺南韓舉行嘅世青盃D組亮相，以2:1反勝南非U20。年僅15歲嘅久保建英，喺呢場分組賽首戰先列後備，結果日本上半場意外落後一球，當換邊後早段追和1:1後，千呼萬喚下喺59分鐘入替，踢到72分鐘，堂安律同佢喺禁區內嚟一次簡單撞牆，順利左腳熨射建功，助日本鎖定三分。