今次日馬（10日）編跑十一場，兩場泥地九場草地，用C跑道角逐，受颱風影響，連日有傾盆大雨，對兩條跑道都會有影響，留意公布或臨場情況。潘頓差一場就追平莫雷拉，必把握對方停賽盡數胡，勢成眾矢之的。季尾賽事變數多，舊馬跑殘，質新馬進度徘徊，亂局利爆冷。

第七場四班泥地1650米：「曾幾何時」季初轉馬房後曾經抖過，到三月份復出，跑兩場谷草熱身，最近跑番泥地首本一哩賽，即取得贏位，始終季內用得唔多，合共跑了七場，在體力上會佔優勢。此駒泥地耍家，上季兩度跑濕慢場地，得一冠一亞，最近在正常場地，同樣取得贏位，性能廣泛，且形成一條鐵馬纜。今回操足而來，配李寶利也合拍，負磅唔重，爭勝機會可秤先。

「威勢之寶」路有專長，季內狀態長期見好，上仗跑草地大長途落敗，就當賽前試個大閘，睇表現亦不會消耗太多體力，復課如常備戰，馬身養得茁壯，快跳步伐硬朗，此駒場地性能亦廣泛，乾濕泥都可應付，回配田泰安最合拍，論馬也是坐位望贏之選。

「萬馬歡騰」剛戰在同程得亞軍，匆匆又派遣上陣，密跑能否應付，體重公布不跌反增，反映食慾好體力強，可放心繼續跟進。「金獅雷將」上仗後追甚勁，復課快跳更墜手好火，然而細粒仔體重再下跌，令人有戒心，只宜作配。其餘「靚加加」加盟文廐已跑兩仗，今次排內檔有助發揮，扒冷門可優先留意。