劉心悠及梁祖堯今日到元朗錦田有機薈低碳農莊，出席端午節活動，兩人示範包糭，梁祖堯表現純熟，而心悠BB就顯得雞手鴨腳啦，成日偷望人，又搞到妝又溶、頭髮亂飛，好搞笑。事後，佢笑言喺後台有練習，已經包得比以前好：「我有進步啦，以前一散就放棄，一定要咬住（鹹水草）唔放先靚。」

有報道指心悠BB不續約星皓，佢坦承同星皓確實係結束9年合作關係：「我有同王生(王海峰)傾過，因為我想自己開公司，佢都贊成，依家喺尖沙嘴籌備緊。」問佢係咪會捧自己做一姐？心悠BB表示：「都好喎，始終簽經理人公司會有限制，自己做闊度大啲，自己想focus喺內地，遲啲先會簽新人。」佢感恩王海峰由新人開始投資，佢就笑言囡囡終於要長大啦。