秘密產女嘅英皇高層霍汶希（Mani）日前喺微博貼出同兩歲大囡囡Honey嘅合照，令呢個保守咗兩年嘅秘密終於公開咗。有指Mani懷有內地富商骨肉後冇耐就分手，懷孕期間曾患抑鬱症，女兒又試過發燒抽筋導致缺氧，令Mani更珍惜母女情。

今日有報道指事緣囡囡Honey喺八個月大時，唔適應北京嘅寒冬而搞到發高燒，Mani同胞姊帶埋Honey去睇醫生，不過當時醫院太多人，要等一個鐘，就係等咗呢一個鐘期間，Honey陷入抽搐昏迷。Mani憶述呢一刻，令佢大感心痛： 「那一刻，我失去平日嘅理性，只係叫醫生救救我個寶貝。」 然後跪喺地下不斷喊，醫生就幫囡囡打針，又到北京雍和宮參拜；有指係為咗愛女而拜神，Mani承諾囡囡健康，佢就會叩一千次頭答謝神恩，而當日，Mani就先叩一百下。

Mani愛女心重，為咗令囡囡喺一個健康環境下長大，佢更將壞習慣戒晒，包括戒咗食咗廿幾年嘅香煙，Mani話： 「要留番條命去養育個女。」 Mani已成功戒咗兩個幾月喇，母愛嘅力量真係唔可以睇少！



逢周五隨《蘋果日報》附送嘅時尚美容雜誌《add》第二期已出版；拎唔到書嘅朋友，可以上番《add》嘅官網 http://hk.add.nextmedia.com/睇番足本網上版，除咗有陳慧琳訪問，仲有好多時裝靚嘢睇！