會德豐(020)將軍澳Capri加兩成管理費才有座頭保安引起批評，交樓質素都「做啲唔做啲」，資深驗樓師賴達明驗收兩個單位，其中一個特色單位，主人房窗外與外牆銜接位竟漏去防水物料，現出熔熔爛爛的罅隙，玻璃幕牆又有兩個可插入至少8吋長的螺絲批，一旦打風落雨，房間勢將濕淋淋，批盪剝落勢在必行。

業主以近800萬元買入一個特色單位，兩房間隔，另連一個平台。客飯、睡房及廚房油漆批盪手工佳，平滑鋪實沒瑕疵，來去水也沒滲漏，卻去到廁所門前就失手，燈掣裝甩，甩到徒手拎得開。明哥走進廁所，雖然來去水沒有問題，但他指出：「廁所有4個問題：鏡櫃膠邊做啲唔做啲。地下遮住去水喉封板可移動有機會攝水入渠邊。而去水喉邊是無修口，現出罅隙，可見石屎層，浴室用水時由攝水入地磚底，如果防水層破損會造成滲漏風險。最後是廁所牆邊及門框防水邊做啲唔做啲。」

走出幾百呎的平台，一眼睇到地鋪至少3處顯而易見的崩裂。不過更大問題是，主人房窗外牆邊，明哥發現：「主人房窗外邊嘅防水膠係無咗，由地下一路上去，係爛哂，基本上低層位置都無，中高層都係斷斷續續…爛哂！情況好明顯同嚴重，唔知留條罅來做乜。」業主搭訕稱，有同類單位業主向發展商反映，當時獲得回應「是咁的!」，明哥按奈不住怒斥：「係咁？好明顯係爛哂喎，點會係咁！」然後玻璃幕牆窗與窗的接駁位置有窿，一支8吋長螺絲批，可以完全插入。

他認為，單位最大問題是「罅」，主人房窗外防水物料明顯做漏，打風落雨容易入水，勢將影響主人房牆身，而玻璃牆亦漏膠現窿，正對睡房窗台，長期入水，窗台漏硬水，批盪會浮起剝落，建議業主要求發展商必須補窿。另外，單位玻璃窗崩花多，尤其是主人房的玻璃窗，已超出可接受水平，需要更換。

單位外牆漏防水膠邊的滲水風險雖大，但一系列交樓工種，有10項獲90分或以上，其中慣常扣大分位，包括來去水、地台、油漆都滿分，拉高整體評分至88分。明哥總結，Capri驗過多個單位，平均得分為「8」字頭，與同區同系Parkside交樓質素相若。

會德豐發言人回應，有關上述單位執修事宜，已收到業主提交的執修列表，會安排承建商依據既定執修程序進行，詳情再另行通知業主。

蘋果財經，關心你飯碗
http://fb.com/appledailyatm