2010年，仍是屯門天主教中學學生的梁逸峰，在第61屆香港學校朗誦節誦讀了詩人孟浩然《宿業師山房待丁大不至》，佢嘅45度仰視，抑揚頓挫，技驚四座，被喻為「特別的朗誦技巧」。

呢條片，竟然喺2014年再度於網上瘋傳，令梁逸峰成為網民嘲笑欺凌對象。當時社交網絡facebook出現一個叫「梁逸峰」專頁，上載一篇約300字「個人感想」，聲稱「一切安好，不用擔心」，又謂希望高登仔高抬貴手。但呢個版主「梁逸峰」是否真是梁逸峰本人，不得而知，但校方就表示之後曾與梁聯絡，其後指他「情況良好」，希望可回復平靜生活。(新聞連結： http://bit.ly/2f6uBdC )

事隔數年，直至今年9月1號，22歲嘅梁逸峰又成為了網絡紅人，因為一位女學生喺微博爆料，話梁逸峰依家已為人師表，今年仲做咗佢嘅中文老師。

呢位女同學話：「梁逸峰是我們學校今年新晉的中文老師……如果你不知道他是誰的話，請百科，再不然，百度我有特別的朗誦技巧表情包。沒有說笑，我突然不想報朗誦節了。」又百度又微博，但寫嘅係繁體字，感覺夢幻。

據知，梁逸峰任教嘅係聖母玫瑰書院，班學生知道自己個中文老師係梁逸峰，surprise！之後開始竊竊私語，到梁sir上台時，台下掌聲雷動，「很有老師氣場」。

有網民於fb留言：「真心覺得佢又有才華又型，聽講係好老師嚟嘅，我啲師妹話佢有大長腿，遲啲會返去睇下真人。」估唔到大家想欣賞特別的朗誦技巧之餘，仲想睇佢長腿……

呢單消息，今日仲上埋港聞，呢位爆料女同學亦成為追訪對象，為免大家繼續關注，所以開學第二日，佢已經要喺微博統一回覆話：
1.老師不是移動表情包，真人端正挺拔，蠻好看的
2.我校參加朗誦之同學也有特別的朗誦技巧，表情包因人而異
3.私隱問題，正面照片不能未經本人同樣隨便發放（表情包大家自便）
4.老師沒有長的很快，是閣下老的很快

亦有梁逸峰舊同學爆料，話：「佢朗誦嗰期，喺大陸仲紅過啲明星，佢bilibili（大陸網站）啲片幾百萬view，去中國交流有學生上b站鬼畜（即bilibili）問我哋識唔識佢…」、「講真佢當年真係喺被任教中文嘅副校的去地下醫療室練朗誦，喺正門都聽到佢朗誦……」、「有一次佢貴為候選學生會內閣『敢閣』嘅會長喺男廁見佢拎好多格廁紙，但只係用兩格嚟抹手，第二朝佢發嘅政綱話要推廣節約用紙。」

最勁嘅仲係，就連「共青團中央」微博、「港人講地」同「新華香港」fb都有報道梁逸峰成為中學教師呢單嘢，未知係咪同去年佢參加過第18屆《基本法》全港大專生辯論賽決賽有關，梁逸峰當時仲獲選為決賽最佳辯論員。

講開又講，大陸網民唔知點解對梁逸峰非常關注，單單係「【紅日】梁逸峰你朗誦這麼屌你家裡人知道嗎？」，呢條片喺bilibili錄得725.9萬點擊；另一條「Gentleman X 香港中學生梁逸峰【破恨南飛】」，喺bilibili都有226.2萬點擊。點解大陸人對梁逸峰嘅興趣竟然仲大過香港人？

順帶一提，浸會大學中文系畢業嘅梁逸峰，其實都有微博0架，仲經常更新，暢遊中國大江南北，曾參加東北師範大學冬季交流營、復旦大學交流，足證依家中港教育交流如何頻繁。

依家嘅梁Sir，高頭大馬，個樣冇點變，至於把聲呢……未知梁Sir除咗可以教「特別嘅朗誦技巧」外，會唔會教埋辯論隊？