另一位何文田街坊PJ亦附和︰「完全同意！我都係住欣圖軒！周圍環境都算寧靜！最重要係無街童流連，街坊都斯文啲！」
但網友BillieBug就大唱反調，「好似我昨日傍晚，由欣圖軒乘的士到油麻地地鐵站，足足坐咗30多元，仲要塞成半個鐘，因為呢十年以來，窩打老道同培正道，係未有過一個星期唔掘路，仲要加埋過時過節勁塞車，的士又好難等到，小巴又要排大隊，我個人覺得不甚方便！」佢建議不妨先喺何文田租樓，如果適應到，再買樓都未遲。
若果sam9035想用200萬喺何文田置業，可以揀9年樓齡嘅欣圖軒、13年樓齡嘅太平花園，但只有500餘呎；600餘呎之選有太平閣、九龍總商會大廈同俊民苑，不過樓齡較高，介乎16至27年。講到尾，買樓唔應該單憑校網作考慮，好似畀科技大學破格取錄嘅小發明家陳易希，及近日被中大破格取錄嘅數學天才陳瀚道，兩位都唔係出自傳統名校，但一樣有出色表現，所以話，讀書叻唔叻，始終係靠自己！