史特加隊長根拿上周六喺球隊主場以1:0小勝禾夫斯堡嘅德甲聯賽中，比賽到最後幾分鐘時佢喺禁區頂頭槌同對方門將卡斯迪爾斯發生碰撞，卡斯迪爾斯左膝撞正根拿右邊面，根拿受傷跌咗喺地，喺球場上接受咗幾分鐘治療之後再由擔架抬離球場，仲即刻要送院。由於當時史特加已經用晒三個換人名額，所以佢哋最後幾分鐘係得10人應戰，好在仍然能夠力保勝果。及後，史特加喺球會官方Twitter透露，根拿面部多處骨裂，日內需要接受手術，同時祝佢好運同埋早日康復。

據報道，32歲嘅史特加中場根拿鼻骨、上顎、眼窩等多處骨裂要做手術，但暫時仲未知佢幾時可以復出。