今日無綫台慶拜神,由阿叻陳百祥、曾志偉,陳芷菁及崔建邦擔任司儀,出席歌星包括許廷鏗、鄭俊弘、羅鈞滿、王君馨及吳若希等。
有指今年台慶獎金及獎品加碼,無綫高層余詠珊承認此事,並解釋今年想做一個類似聯歡會嘅party:「個個返到嚟都開開心心。」問到可是因為近日是非多多,故以獎金獎品加碼嚟淡化事件?余詠珊冇直認,佢只係話:「你睇我哋個台個景,半年前已決定咗,想今年方向都係開心。」余詠珊又表示:「我哋一開始話上堂,就定咗一個方向,就係要好開心,因為我哋覺得從來未做過一個節目係,完全好似自己屋企人生日,嚟嘅都有好多獎金獎品。」
有報道指今屆台慶獎品包括1,000股無綫股份、一噸汽油,以及50萬MV製作宣傳費,MV製作宣傳費呢個獎,就係留俾歌手玩遊戲時抽獎。問余詠珊係咪因為無綫已經冇乜歌手,所以出呢招吸引佢哋返嚟?余詠珊否認。
至於點解今年咁少英皇歌手出席?係咪因為星夢娛樂成立,令英皇不滿無綫偏心自己歌手?余詠珊表示: 「英皇歌手我哋有邀請,其實都係咁上下咋喎。因為我哋主要係要啲歌星嚟參與,咁都有邀請佢哋,度到咪度到,度唔到都冇辦法0架。」問佢覺唔覺得今年冇咗祖兒同Twins佢哋有啲失色?余詠珊斬釘截鐵謂:「我唔覺,我覺得最緊要開心嘅啫。」記者提到無綫同英皇關係一向良好,余詠珊未等記者問完即說:「依家都好呀,依家都好呀!」余詠珊老公何哲圖係星夢娛樂老闆,依家無綫同星夢一家親,英皇會否不是味兒?可以想像,不過余詠珊就強調英皇歌手只係度唔到期出席而已。
余詠珊續道:「其實應該咁話,我哋廣發英雄帖,希望所有人都會嚟,譬如今年有啲artist唔喺香港,有啲撞咗期,咁都冇辦法。」
而剛加盟星夢娛樂兼做埋一哥嘅鄭俊弘,加入無綫多年,今年係第一年有機會參加台慶,仲要係有份演出opening。鄭俊弘話:「真係好特別嘅一年!」而為隆重其事,鄭俊弘有埋西裝贊助,鑽飾都應該有。
不過星夢娛樂剛成立,英皇眾歌手即神奇地唔得閒參演無綫台慶演出,但鄭俊弘就話:「唔係喎,有G.E.M.,有Kay(謝安琪),大家一齊唱阿倫嘅歌。我覺得又唔會咁計嘅,佢哋唔會唔開心。」