英甲球隊修安聯今晚作客梳士貝利，前鋒尼爾蘭加缺席，原因就比較特別，原來佢目前處於假釋狀況，要畀當局觀察同埋宵禁，活動時間只限朝7晚7，而呢場波係當地時間夜晚7點45分先開波，所以曾經踢過紐卡素嘅尼蘭蘭加就唔可以上陣。

呢個26歲曾經喺英超亮相嘅前鋒，今年5月因為網上銀行舞弊案被判囚8個月，而佢坐咗10個禮拜，8月就放監，只需要戴住電子儀器畀當局監察，同埋要宵禁姐。而蘭加可以提早放監，原因係行為非常良好之外，咁乖仔當然係為咗保住份工啦，修安聯喺暑假期間都冇放棄佢，而佢喺上個禮拜亦今季首次上陣，不過今晚嗰場就唔踢得喇。領隊菲臘布朗話，今場係蘭加最後一次因為呢個原因缺陣喇，因為佢過多兩個禮拜就真正回復自由。值得一提，呢位菲臘布朗就係當年教侯城，曾經喺英超半場期間輸緊幾球時，叫成班波唔坐喺草地上面，大庭廣眾聽佢訓話嗰位。